សេចក្តីប្រកាសព័ត៌មានធនាគារជាតិនៃកម្ពុជាទាក់ទងនឹងការព្រួយបារម្ភរបស់អតិថិជនចំពោះធនាគារ ព្រីនស៍ ម.ក.
នៅថ្ងៃទី១៨ ខែតុលា ឆ្នាំ២០២៥ ធនាគារជាតិនៃកម្ពុជា ក្នុងនាមជាអាជ្ញាធរត្រួតពិនិត្យប្រព័ន្ធធនាគារនៅកម្ពុជា បានចេញសេចក្តីប្រកាសព័ត៌មានជម្រាបជូនសាធារណជនអំពីការចាត់វិធានការចាំបាច់នានា ដើម្បីធានាប្រតិបត្តិការជាប្រក្រតីនូវគណនីទាំងឡាយរបស់អតិថិជននៅធនាគារ ព្រីនស៍ ម.ក. និងជាពិសេស ដើម្បីធានាសុវត្ថិភាពសាច់ប្រាក់របស់អតិថិជនរបស់ធនាគារនេះ។
សេចក្តីប្រកាសនេះបានចេញផ្សាយភ្លាមៗ បន្ទាប់ពីសង្កេតឃើញថា ក្នុងរយៈពេលពីរថ្ងៃចុងក្រោយនេះ មានអតិថិជនមានការបារម្ភហើយបានទៅដកប្រាក់របស់ខ្លួនវិញ នៅធនាគារ ព្រីនស៍ ម.ក.។ ដោយឡែកព័ត៌មានផ្សព្វផ្សាយពាក់ព័ន្ធនឹង ធនាគារ ព្រីនស៍ ម.ក. អាជ្ញាធរមានសមត្ថកិច្ចរបស់កម្ពុជា បាននិងកំពុងចាត់វិធានការត្រួតពិនិត្យ និងស្រាវជ្រាវយ៉ាងយកចិត្តទុកដាក់ ដើម្បីធានាថា ធនាគារនេះមានអនុលោមភាពត្រឹមត្រូវតាមច្បាប់កម្ពុជា។
ធនាគារជាតិនៃកម្ពុជា
